Hamasi njoftoi se ka liruar ushtarin izraelito-amerikan Idan Aleksander pas kontakteve të drejtpërdrejta me administratën amerikane.

Në një deklaratë të bërë nga organizata e rezistencës, u tha se vendimi u mor në kuadër të përpjekjeve për të siguruar një armëpushim në Gaza, për të hapur portat kufitare dhe për të ofruar ndihmë humanitare.

Eksperti ushtarak dhe i sigurisë, Rami Abu Zubaydah, tha për Shehab News se ky hap është kontakti i parë i drejtpërdrejtë midis Hamasit dhe Uashingtonit pa ndërmjetësimin izraelit apo arab, duke shtuar se kjo forcon njohjen de facto të Hamasit si një aktor politik.

Ebu Zubaydah shtoi gjithashtu se marrëveshja, për shkak se u realizua jashtë qeverisë së vet, e ka dobësuar Kryeministrin izraelit Benyamin Netanjahu dhe e ka paraqitur atë si një "aleat të lënë jashtë loje".

Sipas Abu Zubaydah, lirimi i një të burgosuri amerikan është një veprim i zgjuar taktik që tregon fleksibilitetin e Hamasit dhe e vendos Izraelin në një pozicion të vështirë në sytë e opinionit ndërkombëtar, veçanërisht pasi vendimi është i lidhur me hapjen e portave kufitare dhe hyrjen e ndihmave pa bërë lëshime në lidhje me çështjen e të burgosurit palestinezë.

Analisti politik Mohammed Daraghme tha se lirimi i Aleksandrit nuk ishte thjesht një gjest I vullnetit të mirë, por një hap i llogaritur që pasqyron negociatat e papublikuara midis Hamasit dhe Uashingtonit.

Daraghme theksoi se edhe pse kjo nuk konsiderohet një fitore e madhe, ajo i hapi derën presionit amerikan mbi Izraelin, veçanërisht pasi marrëveshja e mëparshme e shkëmbimit të të burgosurve (lirimi i disa të burgosurve në këmbim të një armëpushimi) ishte e suksesshme.

Daraghme u shpreh se angazhimi i drejtpërdrejtë me SHBA-në mund të transformojë mjedisin e negociatave, por paralajmëroi se çdo përparim varet nga serioziteti i administratës amerikane në frenimin e Netanyahut.

Nga ana tjetër, analisti politik Mohammed al-Medhun e vlerësoi lirimin e të burgosurit amerikano-izraelit si një hap të llogaritur që synonte ta detyronte Uashingtonin ta njihte Hamasin si një aktor politik në vend që të mbetej rob i manovrave të Netanyahut.

El-Medhun theksoi se Presidenti i SHBA-së, Donald Trump, mund ta përdorë këtë incident si një avantazh zgjedhor, veçanërisht me vizitën e tij të pritur në Lindjen e Mesme.

Por eksperti paralajmëroi se ky veprim mbart rreziqe dhe mund të dobësojë ndikimin negociues të Hamasit në të ardhmen nëse nuk përkthehet në garanci konkrete, siç është një armëpushim i përhershëm ose heqja e rrethimit.

Shkrimtarja politike Lika Mekki theksoi se lirimi i Aleksandrit është një sukses i ndërmjetësimit Egjipt-Katar, që synonte të ushtronte presion për ndërmarrjen e këtij hapi me qëllim vendosjen e Netanyahut në një bllokadë politike.

Mekki e përshkroi kryeministrin izraelit si një "bartës të jelekëve vetëvrasës", duke shtuar se pranimi i kompromiseve do të përbënte vetëvrasje politike, ndërsa refuzimi i tyre mund të çonte në një përballje me Uashingtonin.

Ajo gjithashtu vuri në dukje se njohja e mundshme e shtetit palestinez nga SHBA (si pjesë e një marrëveshjeje me Arabinë Saudite) mund të sjellë një ndryshim rrënjësor në këtë çështje.