Partia opozitare e krahut të majtë në Greqi, New Left, kritikoi të martën shitjen e një prej kompanive kryesore të mbrojtjes në vend te SK Group i Izraelit.

Portofoli i SK Group përfshin Industritë Ushtarake të Izraelit (IMI) dhe Tersanet Izraelite.

Partia në një deklaratë u shpreh se: “Kjo nuk është vetëm një shitje e thjeshtë, por një tregues i ri i bashkëpunimit të regjimit (Kyriakos) Mitsotakis në gjenocidin në Palestinë.”

Në deklaratë thuhej: “Në një periudhë kur po ndodh gjenocidi, qeveria e Mitsotakis, duke e lidhur vendin pas karrocës së Izraelit, po ia dorëzon sektorët kritikë me kushte skllavërie përmes një zgjedhjeje të dëmshme kombëtare.”

New Left e quajti transferimin e ELVO-s, një ndërmarrje e industrisë së mbrojtjes dhe automobilave me qendër në Selanik, tek një holding izraelit, si një hallkë tjetër në procesin e shitjes së infrastrukturave strategjike industriale dhe publike.

U vlerësua se: “Kalimi i industrisë më të rëndësishme të mbrojtjes greke në duar të huaja po e dobëson sigurinë kombëtare të vendit dhe pavarësinë teknologjike.”

ELVO (Hellenic Vehicle Industry), prej gati gjysmë shekulli prodhon autobusë, kamionë të rëndë, xhipa ushtarakë, automjete të blinduara dhe tanke për Forcat e Armatosura Greke, kryesisht me licenca të marra nga palë të treta.

Në vitin 2020, shitja e kompanisë u përfundua për rreth 3,4 milionë dollarë tek një konsorcium i përbërë nga Plasan Sasa dhe Naska Industries me origjinë izraelite — pjesë e SK Group — si dhe biznesmeni grek Aristidis Glinis.

SK Group njoftoi të martën se procesi i marrjes në pronësi të plotë (100%) të ELVO-s ka përfunduar.